કરશો તમે સિતમ

કરશો તમે સિતમ અમે આંસુ વહાવશું
પથ્થરતણાં જવાબમાં મોતી લૂંટાવશું

આવો, અમે કશામાં કમી કૈં ન લાવશું
મોતીની શી વિસાત છે ? જીવન લૂટાવશું

ગુણ નમ્રતાનો છે, તે ભલા ક્યાં છુપાવશું ?
એ માનશે નહીં,તો અમે મન મનાવશું

અમને અમારા મૃત્યુનું કૈં દુઃખ નથી, છતાં
દુઃખ એ જરુર છે કે તને યાદ આવશુ !

અમને ભલે. તમારી છબી પણ નહિ મળે
ગઝલો તમારા જેટલી સુંદર બનાવશું

આ જિંન્દગી તો એક ઘડી થોભતી નથી
કોને ખબર કે ક્યારે તને યાદ આવશું ?

‘આસિમ’ કરો ન આમ શિકાયત નસીબની
રુઠી જશે તો બીજો ખુદા ક્યાંથી લાવશું

-: આસિમ રાંદેરી

મારી એ કલપ્ના હતી કે વીસરી મને, કીંતુ એ માત્ર ભ્રમ હતો થઇ ખાતરી મને,
ભૂલી વફાની રીતના ભૂલી જરી મને, લ્યો એના લગ્નની મળી કંકોત્રી મને.

સુંદર ના કેમ હોય કે સુંદર પ્રસંગ છે, કંકોત્રીમાં રૂપ છે, શોભા છે, રંગ છે,
કાગળનો એનો રંગ છે ખીલતા ગુલાબ સમ, જાણે ગુલાબી એના વદનના જવાબ સમ,
રંગીનીઓ છે એમાં ઘણી ફૂલછાબ સમ, જાણે કે પ્રેમ કાવ્યોની કોઇ કિતાબ સમ.
જાણું છું એના અક્ષરો વર્ષોના સાથથી, શીર નામ મારૂ કીધું છે ખુદ એના હાથથી,
ભૂલી વફાની રીતના ભૂલી જરી મને, લ્યો એનાં લગ્નની મળી કંકોત્રી મને.

કંકોત્રીથી એટલુ પુરવાર થાય છે, નિષ્ફળ બને જો પ્રેમ તો વહેવાર થાય છે,
જ્યારે ઉધાડી રીતે ના કાંઇ પ્યાર થાય છે, ત્યારે પ્રસંગ જોઇ સદચાર થાય છે.
દુઃખ છે હજાર તોય હજી એજ ટેક છે, કંકોત્રી નથી આ અમસ્તો વિવેક છે,
ભૂલી વફાની રીતના ભૂલી જરી મને, લ્યો એના લગ્નની મળી કંકોત્રી મને.

આસીમ હવે વાત ગઇ, રંગ પણ ગયો, તાપી તટે થતો હતો એ સંગ પણ ગયો,
હાથોની છેડછાડ ગઇ, વ્યંગ પણ ગયો, મેળાપની એ રીત ગઇ, ઢંગ પણ ગયો,
હું દિલની લાગણીથી હજી પણ સતેજ છુ, એ પારકી બની જશે હું એનો એજ છું.
ભૂલી વફાની રીતના ભૂલી જરી મને, લ્યો એના લગ્નની મળી કંકોત્રી મને.

જુઓ લીલા કોલેજમાં જઇ રહી છે

જીવનને આંગણે તારી જુદાઇમાં લીલા
દિવસ કે રાત હોય બન્ને ઉદાસ આવે છે
ને વરસો વિત્યાં છતાં પણ કિનારે તાપીના
હજીય શ્વાસની તારા સુવાસ આવે છે.

જુવાની મહોબ્બતના દમ લઇ રહી છે
મને દિલની ધડકન ખબર દઇ રહી છે
પ્રણય રૂપ ના રંગ જોવાને માટે
બધાની નજર એ તરફ થઇ રહી છે
જુઓ લીલા કોલેજમાં જઇ રહી છે

કમલ જેવાં કરમાં એ પુસ્તક ઉઠાવી
પ્રણય ઉર્મીઓ મનની મનમાં સમાવી
મનોભાવ મુખ પર ન દેખાય તેથી
અદાથી જરા ડોક નીચી નમાવી
મને અવનવી પ્રેરણા દઇ રહી છે
જુઓ લીલા કોલેજમાં જઇ રહી છે

છે લાલી માં જે લચકતી લલીતા
ગતી એવી જાણે સરકતી સરીતા
કલાથી વિભુષીત કલાકાર માટે
કવિતા જ સુંદર બનીને કવિતા
પ્રભુની પ્રભા ની ઝલક દઇ રહી છે
જુઓ લીલા કોલેજમાં જઇ રહી છે

ન સુરમો, ન કાજલ, ન પાવડર ન લાલી
છતાંય એની રંગત છે સૌ માં નિરાલી
બધી ફેશનેબલ સખીઓ ની વચ્ચે
છે સાદાઇ માં એની જાહોજલાલી
શું ખાદીની સાડી મજા દઇ રહી છે
જુઓ લીલા કોલેજમાં જઇ રહી છે

સરળથી ય સરળ છે એની સરળતા
નથી શબ્દ સમજાવવા કોઇ મળતા
લખું તોય લખતાં ન કાંઇ લખાયે
શમી જાય છે ભાવ હૈયે ઉછળતાં
અજબ મારા મનની દશા થઇ રહી છે
જુઓ લીલા કોલેજમાં જઇ રહી છે

ભલા કોણ જાણે કે કોને રિઝવવા
અને કોના દિલની કળીને ખિલવવા
એ દરરોજ બે-ચાર સખીઓની સાથે
એ જાયે છે ભણવા કે ઉઠાં ભણવવા
ન સમજાય તેવી કલા થઇ રહી છે
જુઓ લીલા કોલેજમાં જઇ રહી છે

કોઇ કહે છે જાય છે ચિત્રો ચિતરવા
કહે છે કોઇ જ્ઞાન ભંડાર ભરવા
કોઇ કેમ સમજે આ બાબતને ‘આસીમ’
અધુરાં પ્રણય પાઠ ને પુર્ણ કરવા
એ દરરોજ ભણતરનાં સમ લઇ રહી છે
જુઓ લીલા કોલેજમાં જઇ રહી છે
-: આસિમ રાંદેરી

સઘળી વસ્તુ ત્યાંની ત્યાં છે

આજથી ત્રણ વર્ષ પહેલા મે "આસીમ રાંદેરી"ની એક નઝમ લખીને મોકલી હતી અને એના જવાબમાં બીજી બે રચના થઈ હતી જે ત્રણે હવેના દીવસોમાં

એજ બગીચો એજ છે માળી
એજ ઉષા સંધ્યાની લાલી
કૈફ છલોછલ પુષ્પની પ્યાલી
કોયલ બુલબુલ ડાલી ડાલી
સઘળી વસ્તુ ત્યાંની ત્યાં છે
............કીંતુ મારી લીલા ક્યાં છે?

એજ બહારો બાગની અંદર
પ્રેમના જાદુ રુપના મંતર
એજ પતંગા દીપના ઉપર
એજ કમળ છે એજ મધુકર
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

એજ ફુવારો ને ફૂલવારી
રંગબેરંગી પ્યારી પ્યારી
મખમલ સમ આ ઘાસ પથારી
જે પર દિલની દુનીયા વારી
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

એજ હજુ છે જૂઈ ચમેલી
આગીયાઓની જ્યોત ઘડેલી
આંબા ડાળે જુઓ ફેલી
એજ ચકોરી ચંદા ઘેલી
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

ચાંદ સિતારા એજ ગગનમાં
માટી એની એજ પવનમાં
તાપી પણ છે એજ વહનમાં
એજ ઉમંગો મારા મનમાં
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

થડ પર બંને નામ હજી છે
થડ પર કોતર કામ હજી છે
બે મનનુ સુખધામ હજી છે
સામે મારુ ગામ હજી છે
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

એજ છે રોનક તાપી તટ પર
એજ છે સામે લીલા ખેતર
વર્ષાની ઝરમરમાં મનહર
દુર જ સંતા મસ્જીદ મંદર
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

આસીમ આજે રાણી બાગે
ઉર્મીને કાઈ ઠેસના લાગે
મસ્ત પવનમાં પુષ્પ પરાગે
કેમ મને વૈરાગના જાગે
સઘળી વસ્તુ ત્યાંની ત્યાં છે
...........કીંતુ મારી લીલા ક્યાં છે?

Few more lines from the email....
"This is how I miss you and miss every moment we have spent together and you say that I do not love you! I do not miss you!?!"