પ્રેમની વાત બસ એટલે જ આટલી મજાની છે

પ્રેમની વાત બસ એટલે જ આટલી મજાની છે,
ઘટના એ આમ તો બુધ્ધિને મળેલી સજાની છે!!

પાયાનો પથ્થર તો સચવાઇ જશે માટીની હુંફે,
ચિંતા સતાવે છે એ તો આ અલ્લડ ધજાની છે.

ભુલી જઈ ફિલસૂફીની વાતો, બસ પ્રેમ કરીએ,
વાત બસ એ એક મારા કે તમારા ગજાની છે!

કૈંક સામ્રાજ્યો બસ આજ ભ્રમથી તૂટી ગયાં:
આનંદો સઘળાં આપણા ને પીડા પ્રજાની છે.

તમારાથી દૂર થવાનો રંજ તો ભુલીયે શકાય,
ન ભુલાય તેવી વાત તમે આપેલી રજાની છે..!